Palaisipan kay Barbara

Hindi maintindihan ni Barbara kung bakit padala pa rin ng padala si William ng kanyang mga sinulat. Mayroong sanaysay, malikhaing pagsulat, o kaya naman ay komentaryo sa laban ng basketball sa tuwing may laro ang DLSU. Malimit siyang magpabasa ng kanyang mga gawa kahit dati pa. Ilang taon na rin kasi silang magkakilala. Mahilig silang magpalitan ng kuro-kuro tungkol sa mga librong binasa o pelikulang pinanood. Madalas din silang magdebate mula sa mga isyung panlipunan hanggang sa maliliit na bagay na pinalalaki para lamang mapahaba ang usapan. Mas mabuti na iyon kasi mas nagiging palagay ang loob nila, mas lumalalim ang samahan, at nakikilala ang isa’t-isa. Minsan naman tatambay lang sila sa bahay ni Barbara at makikinig ng mga awiting dinownload sa piratebay. Si William maya’t-maya ang tingin sa computer, inaabangan kung seeding na ba yung kanta. Kinakain daw kasi nito yung memory ng computer. Kaya si Barbara kapag nagdodownload ng pelikula e ganoon na rin ang ginagawa kapag seeding na, erase kaagad. Bumili na rin siya ng external dahil hindi na kasya sa computer yung kung anu-anong nakuha sa pagdodownload. Habang nakatutok si William sa computer ay mapapangiti na lang sa tabi si Barbara at kapag lilingon si William ay babalik sa normal na mukha na parang walang nangyari na animo ay may iniisip lang. Minsan naman ay mag-aaya si William na tumambay lang sa damuhan ng CCP o Rizal Park. Mag-uusap sila tungkol sa buhay, magtatawanan at magbubuntong-hininga lalo na kapag napag-usapan na ang tungkol sa pamilya ni Barbara at kung paano hinarap ni William ang buhay sa bilangguan.

 

Lahat ng iyon ay ala-ala na lamang kay Barabara. May kurot sa kanyang puso sapagkat hindi niya nasabi kay William ang kagustuhan niyang manatili ito sa buhay niya. Alam niya simula pa lamang na bago sila magkakilala ni William ay may sarili na itong buhay. Ramdam niya ang sakit na dinanas nito sa bilangguan sa loob ng halos tatlong taon at ang patuloy niyang pakikipaglaban sa mapanghusgang kaisipan ng mga taong nakapaligid sa kanya. Ang iba sa kanila ay iniwasan na siya dahil baka idamay pa sila sa kaso. Ngunit may mga nanatiling tapat sa kanya at nakita hindi ang kanyang ginawa kundi ang totoo niyang pagkatao. Isa siyang mabuting kaibigan at mapagmahal na anak. Sa kanyang pagkadapa ay naroon palagi si Barbara handang dumamay sa kanya at ipakita na mayroon siyang matatakbuhan sa panahon ng pangangailangan. Nariyan din ang pamilya ni William na hindi sumuko para sa kanya at patuloy siyang pinatatatag ng kanilang pagmamahal. Minsan nasabi ni William na gusto niya munang mapag-isa at buuin muli ang kanyang sarili. Hindi alam ni Barbara kung ano ang mararamdaman pero wala siyang nagawa. Hindi naman naging sagabal ang kanilang pagkalayo. Parati pa ring iniisip ni Barbara si William, inaaalala ang kanilang pinagsamahan at mga tawanang pinagsaluhan. Masaya na si Barbara sa ganito. Hindi naman siya makasarili. Kahit sa kanyang pag-iisa ay lagi niyang bitbit si William. Para itong anino na laging nakasunod kahit saan man siya magpunta. Sinusubukan niya ring kalimutan ito. Kapag may mga lalaking nanliligaw ay binibigyan naman niya sila ng pagkakataon. Ngunit sadyang mailap sa kanya ang pag-ibig. Naghahanap siya ng katulad ni William. Alam naman niyang wala itong katulad. At alam din niya na hanggang hindi niya inaalis si William sa kanyang isipan ay walang ibang makakapasok dito. Alam din niyang hindi pa siya handa para gawin ito. Alam din niyang kailangan na niyang bumangon muli at pulutin ang mga piraso ng sarili na animo ay nawasak. Ninanais pa rin niyang magbalik si William sa kanyang buhay at patuloy na hinihintay ang araw na magkasama silang muli at hindi na magkakahiwalay pa. Pag-asa na lamang ang taninging bumubuhay sa kanya at ang pananabik sa kanyang muling pagdating.    

Advertisements
Posted in: Uncategorized

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s